بحلم كمان 

وأنا فوق فراش الأمنيات

 لازمني  السهاد
وحلمت صاحي
 صاحي وبهدهد في الفرح
لمّان سنونو اتكسرن
فنّاها لي عين الشمس
هاك يا شمس سنون اللبن
وأديني من ضوك يقين
أديني من دفئك حنين
بقراكي مسدار للوطن

اتيقنت بيك
جلّ الوقف
مشمّر للهتاف
جلّ النضف
من انكسارات الكفاف

جلّ العرف
معناكي أو.....
جلّت ظنوني الفيك خيولا اتوقفن

واتيقنت بيك
لا غيمة غطت ضي وشيك
لاحزن عشرق في حلوق كل الخلوق
البيكي آمنو واحتفو
يدوك مناهم وريدتم
تديهم الاحلام دفو
تسقيهم الايمان يقين
وبرضو منك ما اكتفو
يا واضحة فاضحة ومنتهى
القلب غيرك ما أشتهى

والشعر اسفر في الغموض
لما اصطفاك موضوعو او عنوان بها
جاييك مستّف بالعشق
جاييك موشّح بالصدق
جاييك يا حلمي السكن
واتيقنت بيك
يا احلى ما وهب الوطن
وبحلم كمان